आइत, फाल्गुन ११, २०७६
Sun, February 23, 2020

श्रीमतीको अवशेषसँग बर्षौं देखि सँगै सुतिरहेका छन् यी व्यक्ति


  • इन्द्रेणी समाज
  • प्रकाशित मिति : शुक्र, माघ २४, २०७६


काठमाडौं,माघ २४ । माया बाचुञ्जेल मात्र होइन, मृत्युपर्यन्त पनि गरिन्छ । यस भनाइलाई भियतनामका एक व्यक्तिले सार्थक बनाएका छन् । श्रीमतीको मृत्यु सहन नसकेर भियतनामका एक व्यक्तिले उनी गाडेको चिहान खनेर अवशेष निकाले, त्यसलाई प्लास्टर गरिएको मूर्तीसँग उनी विगत १६ वर्षदेखि सुतिरहेका छन् ।

जब ली भानको यस्तो चकित पारिदिने घटना सन् २००९ मा सार्वजनिक भयो, तब धेरैले यो खबर झुटो भएको ठाने । किनभने कसैले आफ्नी श्रीमतीको अवशेष खनेर निकालेको र त्यसलाई घरमा ल्याएर सँगै सुतिरहेको छ भन्ने खबर पत्याउन जो कोहीलाई पनि गाह्रै हुन्छ । तर यो कुरा साँचो हो । आफन्त, छिमेकीले उनको यस्तो क्रियाकलापको विरोध गरेपनि उनले भने आफ्नी श्रीमतीलाई कतै जान दिएका छैनन् । यो क्रम विगत १६ वर्षदेखि चलिरहेको छ ।

भानको सन् १९७५ मा विवाह भएको थियो । विवाह अघि उनीहरुले एकअर्कालाई चिन्दैनथे । भान, सेनाका जवान थिए । सेनाको जागिरबाट घर फर्किएका बेला निकै सानो उमेरमा नै उनको विवाह भयो । विवाह पछि यी दुईको प्रेम झाङ्गियो, उनीहरुको जीवन निकै खुसी साथ अघि बढिरहेको थियो । उनीहरुले सात सन्तान जन्माए । तर घरबाट टाढा रहेका भानले सन् २००३ मा श्रीमतीको अचानक मृत्यु भएको खबर पाए । उनी घर हानिए तर उनी घर पुग्नु अगावै श्रीमतीको अन्तिम संस्कार गरेर गाडिसकिएको थियो ।

श्रीमतीको मृत्यु भएको सुरुवाती दिनमा ली भानले आफ्नो दिनरात श्रीमती गाडिएकै चिहानमा बिताए । तर केही महिना पछि खराब मौसम र पानी पर्न सुरु भएपछि उनी समस्यामा परे । त्यसपछि उनले श्रीमती गाडिएकै ठाउँमा खाल्डो बनाउने र उनी नजिकै सुत्ने निधो गरे । तर खाल्डो खनेर मृतक श्रीमतीसँगै बुवा सुतेको थाहा पाएका उनका सन्तानले उनलाई चिहानमा सुत्न दिएनन् । तर भानले श्रीमतीलाई आफूबाट टाढा राख्नेबारे सोच्नै सकेनन् ।

एकदिन भानले विचार गरे, यदि उनी श्रीमतीसँग चिहानमा सुत्न सक्दैनन् भने श्रीमतीको अवशेषलाई आफूसँगै घरमा त राख्न सक्छन् नि । सुरुमा उनले चिहान खने, त्यसपछि श्रीमतीको हड्डी जम्मा गरेर ब्यागमा राखे । त्यसपछि उनले महिलाको आकृति दिइएको एउटा खोक्रो मूर्तीलाई सिमेन्ट, प्लास्टर, बालुवा, ग्लूको प्रयोग गरेर बनाए र त्यसभित्र श्रीमतीको अवशेष राखे । त्यसपछि त्यो मूर्तीलाई आफू सुत्ने बेडमा राखे । त्यस दिनदेखि आजसम्म उनी श्रीमतीको अवशेषसँगै सुतिरहेका छन् ।

जब ली भानका सन्तानलाई बुवाको क्रियाकलापबारे थाहा भयो तब उनीहरुले रिसाएर आमालाई अन्तिम पटक बिदा दिएको स्थानमा फिर्ता राखिदिन बुवालाई आग्रह गरे । तर उनका बुवाले श्रीमती छोड्न सकेनन् । उनले श्रीमतीको हड्डी फिर्ता ल्याएको थाहा पाएपछि छिमेकीहरु उनको घरमा पस्दैनन् । कतिले भानले रोग सारेको भन्दै स्थानीय अधिकारीलाई पनि जानकारी दिए । पुलिसले उनलाई सम्झाई बुझाई गरे तर उनले केही गरे पनि मानेनन् । तसर्थ पुलिसले पनि उनलाई भन्नै छाडे ।

नेट न्यूज भियतनामका अनुसार ली भान पछिल्लो दुई वर्षदेखि ह्विलचेयरमा छन् तर उनी प्रत्येक राती आफ्नी श्रीमती सँगै सुत्न घिस्रिएर भएपनि खाटसम्म पुग्छन् । उनले श्रीमतीको अवशेष राखिएको मूर्तीलाई सधैं सफा गर्छन् र मेकअप गरेर दिनको दुई पटक लुगा फेरिदिन्छन् ।

‘जब मेरी श्रीमती जीवित थिइन् तब उनले कहिल्यै राम्रो लुगा लगाउन पाइनन् त्यसकारण मैले उनको लागि राम्रो लुगा बनाउनुपर्छ । मैले दिनको दुईपटक उनको लुगा फेरिदिन्छु, ’ ली भानले भने । ‘मानिसहरुले मलाई शवको हेरविचार गरिरहेको छ भनेर पागल भन्छन् तर मलाई के विश्वास छ भने उनी सधैं मसँगै छिन् । मेरो मृत्यु नहुञ्जेल म उनीसँगै सुत्नेछु ।’ एजेन्सी


प्रतिक्रिया
सम्बन्धित समाचार
इन्द्रेणी समाज ||

सम्पर्क


+977-1-9841489835, +977-9849329319
[email protected]

सुचना बिभाग दर्ता नं. १७९५६९ – ०७४–७५
बुद्धनगर काठमाण्डौ,नेपाल

हाम्रो टिम


  • संयोजक / अध्यक्ष –कृष्ण कंडेल
    प्रधान- सम्पादक-दिपक घिमिरे
    सम्पादक-दिपक के.सी.
    व्यवस्थापक – भक्त ब देउवा

सामाजिक संजाल

© 2020 all right reserved to indrenisamaj.com | Site By : SobizTrend Technology